राज्यातील काही भागांत शनिवारी, रविवारी पावसाची शक्यता

राज्यात कोकण वगळता मराठवाडा आणि मध्य महाराष्ट्राच्या काही भागांत उष्णतेची लाट; तर विदर्भात तीव्र लाट आली असल्याने तापमानाचा पारा रोज उच्चांक गाठतो आहे. बुधवारीदेखील विदर्भातील उष्णतेची लाट कायम होती. राज्यातील सर्वाधिक तापमान ४६.४ अंश सेल्सिअस चंद्रपूरमध्ये नोंदविण्यात आले. मध्य महाराष्ट्रात गेल्या दोन दिवसांच्या तुलनेत कमाल तापमानात किंचित घट नोंदविण्यात आली.

 पुण्यात दिवसभरात २३.९ अंश सेल्सिअस किमान आणि ३७.६ अंश सेल्सिअस कमाल तापमानाची नोंद झाली. शहरात सकाळी आणि संध्याकाळी वारा सुटला होता, त्यामुळे उकाडा कमी जाणवला. दुपारी मात्र उन्हाची तीव्रता कायम होती.
राज्याच्या बहुतांश भागात शनिवारी आणि रविवारी पावसाची शक्यता वर्तविण्यात आली आहे. पुण्यामध्ये शनिवारी हलका ते मध्यम स्वरूपाचा पाऊस पडणार असून रविवारी वादळी वाऱ्यासह पाऊस हजेरी लावण्याची शक्यता आहे, अशी माहिती हवामानशास्त्र विभागाचे वरिष्ठ शास्त्रज्ञ अनुपम कश्यपी यांनी दिली.