निसर्ग चक्रीवादळ । लोणावळा, पुण्यात अनेक ठिकाणी झाडे पडली

कोकण किनारपट्टीवर निसर्ग वादळाचा तडाखा बसल्याने त्याचा परिणाम घाटमाथ्यावरील लोणावळा व खंडाळा परिसराला देखिल बसला आहे.
मंगळवारी सायंकाळपासून लोणावळा परिसरात पावसाची संततधार व वारा सुरू झाल्याने बुधवारी सकाळी मुंबई पुणे राष्ट्रीय महामार्गावर अपोलो गॅरेज समोर तसेच तुंगार्ली चौकात, नारायणीधाम शेजारी, रायवुड भागात तिन ठिकाणी, सिध्दार्थनगर, हिलटाॅप खंडाळा भागात नऊ झाडे पडली आहेत.

दरम्यान, पिंपरी चिंचवड शहरात मंगळवार (दि. 2) पासून बुधवारी (दि. 3) दुपार पर्यंत सुमारे 20 झाडे पडल्याच्या घटना घडल्या आहेत. बहुतांश झाडे रस्त्यावर पडली असल्याने वाहतुकीस अडथळा निर्माण झाला होता. मात्र, महापालिका प्रशासन व अग्निशमन विभागाच्या जवानांनी घटनास्थळी धाव घेऊन तात्काळ झाडे हटवून वाहतूक सुरळीत चालू केली आहे.

आज दुपारपर्यंत चक्रीवादळ महाराष्ट्राच्या कोकण आणि मुंबई किनारपट्टीवर धडकले. दरम्यान समुद्राच्या किनारपट्टीसह राज्यभर पावसाच्या जोरदार सरी कोसळत आहेत. त्यातच मोठ्या प्रमाणात वादळ सुटत आहे.