वेळापूर । श्री अर्धनारी नटेश्वराची यात्रा रद्द, पाच पेक्षा जास्त लोकांना एकत्र येण्यास बंदी
आज सकाळी वेळापूर पोलीस स्टेशनला सपोनि दीपक जाधव यांनी बैठक बोलावली होती. यावेळी कावडीचे मानकरी व देवाचे पुजारी उपस्थित होते.
वेळापूर येथे श्री अर्धनारीनटेश्वराचे पुरातन मंदिर आहे . १२ व्या शतकात दौलताबादचे राजे रामदेवराय यादव यांनी या मंदिराचा जीर्णोद्धार केला असून चैत्र शुध्द प्रतिपदा ते चैत्र वद्य अष्टमी अशी सुमारे २२ दिवासांच्या कालावधीत ही यात्रा भरते . यात्रेचे मुख्य आकर्षण म्हणजे देवाच्या हळदी , विवाह सोहळा व वरात हा कार्यक्रम असतो . चैत्री पाडव्याला म्हणजे बुधवार दि . २५ मार्च रोजी यात्रेला सुरुवात होते . रविवार दि . २९ रोजी सायंकाळी ४ वाजता देवाच्या हळदी , बुधवार दि . १ एप्रिल रोजी रात्रो १२ वाजता देवाचा विवाह सोहळा , बुधवार दि . ८ एप्रिल रोजी रात्रो १२ वाजता साडे , त्यानंतर देवाची पालखी व कावडी मिरवणूक ( वरात ) तर बुधवार दि १५ एप्रिल रोजी सकाळी १० वाजता श्री सत्यनारायण महापूजा व सायंकाळी ७ वाजता जागरण गोंधळ आदी कार्यक्रम दरवर्षी केले जातात . या कार्यक्रमासाठी वेळापूर पंचक्रोशीतील भाविकांसह राज्यातून हजारो भाविक हा सोहळा पाहण्यासाठी हजेरी लावतात .
सद्या जगभर कोरोना व्हायरसने थैमान घातले असून या जीवघेण्या विषाणूचा प्रसार रोखण्यासाठी जिल्हा प्रशासनाने जिल्ह्यातील यात्रा , जत्रा , धार्मिक , सांस्कृतीक , राजकीय कार्यक्रमावर बंदी घातली आहे . या बाबतची माहिती वेळापूरचे सपोनि दीपक जाधव यांनी दिली . पाडव्यापासून निघणारी कावडीची मिरवणूक काढू नये . देवाचे धार्मिक कार्यक्रम फक्त पुजाऱ्यांनी करावेत . कोठेही पाच पेक्षा अधिक लोक जमा होतील अशा कार्यक्रमाचे आयोजन करु नये . असे आढळल्यास योग्य ती कारवाई केली जाईल असा इशारा त्यांनी दिला .
सरपंच, ग्रामसेवक, यात्रा कमिटीला निरोप नाही !
या बैठकीला वेळापूर पोलीस प्रशासनाने गावचे सरपंच, ग्रामसेवक, यात्रा उत्सवाचे नियोजन करणाऱ्या यात्रा कमिटीला निरोप न देताच बैठक घेऊन निर्णय जाहीर केला. तसेच याबाबत कोणत्याही ग्रामस्थांना व शांतता कमिटी सोबत तंटामुक्ती कमिटीला कोणताही निरोप देण्यात आला नव्हता.
No comments